من عادات الموظف المثالي الاجتهاد في العمل والسعي إلى تحقيق افضل أداء مع الحرص على عدم إضاعة أي ساعة من ساعات الدوام فيما لا يفيد الشركة التي يعمل فيها، هذا هو حالي في العمل فبعد ان رجعت او عدت من صلاة العصر قلت ورا ما أدخل النت شوي وأشوف وش صار في السوق وبالفعل دخلت موقع تداول فكانت الفاجعه!!!
من نوادر السوق السعودي أن نشهد إيقاف عملية طرح أسهم شركة للاكتتاب العام .. وهذا اللي صار مع شركة الطيار بعد اعلان الهيئة اليوم ان السبب في ايقاف الطرح هو عدم اكتمال عملية بناء سجل الاوامر من قبل المؤسسات المكتتبه وفق النسب المحددة في نشرة الاصدار. الكل عارف ان النسبة المخصصه للمؤسسات هي 100 % من أسهم الشركة واذا كان هناك نيه للغلابا الافراد الاكتتاب تعطيهم الشركة 50 % من الاسهم المسدوحة للاكتتاب.
بالنسبة لي ما كنت مصدق أن فيه اكتتاب ما راح يتغطى في السوق السعودي وذلك لمعرفتي الأكيده بأن الشعب لدينا يهوى الاكتتابات حتى النخاع ولذلك تقوم الصناديق بتغطية الأسهم المحددة لها في عملية بناء سجل الأوامر بغض النظر عن كون السعر عادل (يمكن سمير او مصطفى) أو غير ذلك لان الصناديق متأكده مليون بالميه أن الأفراد راح يغطون حصتهم في الاكتتاب وراح يشترون بالسهم في اليوم الأول من الإدراج كله لعيون المضاربه بالسوق!!!!
من زود الاشاعات في السوق صرت ما اصدق أي كلام قبل ما تعلنه الهيئة رسميا، لكن امس قالي واحد من الشباب الطيبين ونحن نتجاذب اطراف الحديث بعد مبارة الهلال والأهلي والفرحة مرتسمه على محيانا مع اني اشجع الاتفاق .. ان الصناديق معترضه على اكتتاب الطيار لان الهيئة كانت شاده عليهم في الاكتتاب الماضي وطالبتهم بعدم البيع في اليوم الأول، وطبعا الصناديق من باب الضغط على الهيئة واسلوب المبزره امتنعت عن الاكتتاب وبكذا طارت البيعه على الطيار.
الأخ العزيز اللي قالي الخبر دعم كلامه بان اكتتاب هرفي غطته الصناديق بأكثر من 5 مرات مع ان سعر السهم كان 51 ريال، اما اكتتاب السريع فغطته مره واحده وبالقوه مع ان السعر نصف سعر اكتتاب هرفي!! بصراحة ما اقتنعت بكلامه كثير لان فيه فرق بين نشاط الشركتين وربحيتهم ونموهم وغيره من الامور اللي تشجع الواحد يكتتب في شركة ويترك شركة ثانيه.
عموما طارت البيعه على الطيار واصبح حلم إدراج الشركة في السوق سراب والله يعين ملاك الشركة على هذي الصدمة ... لكن اللي يهم المتداولين في السوق ان الشركات اللي كانت تنوي طرح اسهمها بالسوق راح تحسب حسابها الف مره قبل ما تقدم اوراقها للهيئة عشان ما يصير لها مثل ما صار للطيار وبكذا الاخوان اللي كانوا يظنون ان الاكتتابات هي السبب في تراجع السوق خلال السنوات الماضية وانخفاض معدل السيوله راح يكونون اول المبسوطين بمثل هذه الحادث ومصائب قوم عند قوم فوائد!!
اللي اعرفه ان الهيئه تسن القوانين واللوائح يعني اذا ماتبغاهم يضاربون في السهم ويبيعون من اول يوم تضع نضام ان لا يحق لاي صندوق مكتتب ان يبيع الى بعد 3 او 6 اشهر من تداول السهم اما بالنسبه ان الهيئه ضغطت على الصناديق ماتبيعون والصناديق رفضت وكانهم جالسين على دكه في الحاره ويتهاوشون هذي قويه, وبصراحه انا ضد اي اكتتاب يطرح بنظام التخارج تخيل تجمع اكثر من مليار ريال من اكثر من مليون مواطن وتعطيها لشخص واحد ياخذها ويستثمر فيها بالخارج ماذا استفاد السوق او المواطن من تلك الاكتتابات سوى امتصاص للسيوله وقذفها خارج السوق غالبا.
الهيئة أبداً ما ألزمت أي صندوق بعدم البيع، خرابيط مجالس.
أتمنى أن تلزمهم الهيئة بعدم البيع إلا بعد على الأقل 3 أشهر ، كما أتمنى أن تكون % تدبدب السهم ، مثل % تدبدب السوق(وليست مفتوحة)!!!!! لأن قيمة السهم (عادلة) كما يدعون ، فليدعوا العرض والطلب يعمل عمله، وليس التغرير بعباد الله المساكين!!!!!
افضل حل هو ان اي شركة تنوي الإدراج بالسوق تقوم بزيادة راسمالها عن طريق الاكتتاب بنسبة لاتقل عن 30 % من راس المال الجديد مع وضع علاوة اصدار معقوله وبكذا تستفيد الشركة في الحصول على سيوله تساعدها في التوسع بالانشطتها وتعتبر طريقة تمويل للشركة بتكاليف منخفضة.... اعتقد ان هذه الطريقة افضل من قيام ملاك الشركة ببيع اسهمهم على المواطن بعلاوة اصدار وفي الاخير المستفيد عدة اشخاص فقط!!! والصناديق تطلب من الهيئة انها تخصص لها نسبة من الاكتتاب لاجل تبيع الأسهم في اول يوم يعني نشاط الصناديق واقف على الاكتتابات وللاسف ما عندنا فكر اداري عالي في شركات الوساطة والاستثمار
يقولك ان الصناديق اللي اكتتبت غطت 67 % وان السبب في عدم التغطية هو الاجازة اما احلى جمله قاله الطيار انهم ماودهم يطرحون الشركة للاكتتاب بس لان قلوبهم كبيره وودهم الشعب يستفيد طرحوا الشركة للاكتتاب هههههههههههههه
صحيح اكتتاب هرفي كان في حدود 450 مليون ريال واكتتاب السريع اقل من 400 مليون واكتتاب الطيار اكثر من مليار يعني المبلغ مو شوي عشان الصناديق تخاطر فيه وتحجز فلوسها لفترة طويله
الآن انتهت الاجازة وراح ترجع الصناديق من الاجازة وتبدا تكتتب في السهم ههههه مقال جميل