في ما سبق من ماضي الأيام كتبت مقاله عن دار الأركان (يا حبي لهم)، وكان محور حديثنا في ذاك الوقت عن مشاريع الشركة اللي نسمعها ولا نشوفها، اليوم واستمراراً لمسلسل الجعجعة سنغوص في أغوار ميزانية الشركة العاتية لعام 2009 لنستخرج منها ما نستطيعه من الغالي والنفيس لنرصع به أحداث المسلسل الطويلة بطول هذه المقدمة وذلك بحكم أني كنت احد المتعلقين بسهم هذه الشركة (ترى مو دايما متعلق بالأسهم) فبقي باب الود بيننا موصول.
أكثر ما عجبني في ميزانية الشركة للربع الرابع إنها قدرت توفر سيولة نقدية خلال هذي الفترة في حدود 1200 مليون ريال يعني بالعربي مليار وميتين مليون ريال – مبيعاتها للربع الرابع 1220 مليون ريال- يعني ما صرفت ولا ريال من الفلوس اللي جتها وصار رصيد النقدية أكثر من 2200 مليون ريال وهذا شي مطمن لان الشركة راح تدفع قيمة صكوك صدرتها في 2007 بقيمة 2250 مليون ريال ووقت سدادها في مارس الجاي بعد شهرين. يعني كل واحد يحط في بطنه بطيخه صيفي الشركة راح تسد ديونها بدون مشاكل إعسار وحب خشوم.
كمان الشركة قدرت تأخر سداد قرض مرابحة إسلامي بقيمة 500 مليون ريال من نوفمبر 2010 إلى 2011 بفائدة 3.5 % فوق السايبور بدل ما كانت 1.75 % فوق السايبور. صحيح الفائدة ارتفعت بس معليش الشركة اخرت سداد القرض عشان ما تنزنق بعدين، وصار قيمة القروض اللي راح تسددها في 2010 بس 2700 مليون ريال بس.
للأمانة ... اللي سوته إدارة الشركة وتوفير الكاش يحسب لها، بس اللي يحسب عليها أن هذا الشي جاء على حساب تطوير مشاريع الشركة المستقبلية، وهذا اللي شفته في قوائم الشركة من بنود المشاريع اللي ما تغيرت أرقامها مقارنة مع أرقام الربع الثالث وبشكل (اسبيشلي) مشاريع الشركة قصيرة الأجل اللي ممكن تكون جاهزة للبيع خلال حول كامل من تاريخ هذي الأرقام.
حتى بند الممتلكات الاستثمارية (الشركة تقوم بتأجير بعض وحداتها السكنية وتدرج هذي الوحدات في بند الممتلكات الاستثمارية) وقف عن النمو بعد ما كان ينمو بشكل حلو في الفترات الماضية. يعني الشركة باعت معظم مشاريعها اللي طورتها وباقي عندها شي بسيط راح تبيعه في الفترة الجاية وبعد كذا تغني ظلموه !! بس لا ننسى أن الشركة عندها رصيد كبير من الأراضي تحت التطوير (طويلة الأجل) أكثر من 13 مليار ريال ممكن تواصل عمليات البيع في هذي الأراضي لكن مسألة التطوير العقاري (شمس وقمر وعروس وغيرها) لسى بدري عليها على ما أظن.
السؤال الحين: اذا قارب مشروع القصر ينتهي وتبيع كل وحداته وش عندهم شي يبيعونه من وحدات سكنية ؟ مافيه شي على خبري وهل معقولة راح تجلس تبيع في الاراضي لين تبدى مشاريعهم الثانية (شمس الرياض وجده)؟؟